Rydyn ni’n cynnig amrywiaeth eang o chwaraeon dŵr o’n canolfan bwrpasol ym mhentref tlws Ceinewydd yng Ngorllewin Cymru. Gallwch logi offer yma ac rydyn ni’n cynnig sesiynau rheolaidd a chyrsiau RYA ardystiedig, gyda hyfforddwyr sydd â chymwysterau o’r radd flaenaf. Rydyn ni hefyd yn ganolfan AALA gydnabyddedig a gallwn drefnu gweithgareddau ysgol a grŵp.

Mae ein tymor yn cychwyn yn y Pasg ac yn gorffen ddiwedd mis Medi. O’r bae cysgodol y byddwn ni’n lansio, a gallwn weithredu ym mhob tywydd bron!

Mae Ceinewydd yn gartref i’r boblogaeth fwyaf o ddolffiniaid trwynbwl yn Ewrop. Mae’n gyffredin hefyd i weld morloi, llamhidyddion a llawer o adar môr yma. Ewch ar daith ddwyawr mewn caiac i weld byd natur yr ardal hon ar ei orau.

Mae toiledau, cawodydd poeth, ystafelloedd newid, loceri a pheiriant coffi ar gael. Mae’n rhaid talu £5 i logi siwtiau gwlyb; ond rydyn ni’n darparu topiau gwrth-ddŵr, cymhorthion arnofio/siacedi achub yn ddi-dâl.

Sefydliad elusennol ydyn ni, a’n prif nod yw hyrwyddo ffyrdd o fyw iach yn yr awyr agored, annog grwpiau mwy amrywiol i fwynhau bod ar y dŵr, a chodi proffil hwylio a phob math o chwaraeon dŵr yn ardal Gorllewin Cymru. Rydyn ni’n croesawu rhoddion ariannol a gwirfoddolwyr!